¹ Psalmus. Canticum. Pro die Sabbati.
²Bonum est confiteri Domino
et psallere nomini tuo, Altissime,
³annuntiare mane misericordiam tuam
et veritatem tuam per noctem
⁴in decachordo et psalterio,
cum cantico in cithara.
⁵Quia delectasti me, Domine, in factura tua,
et in operibus manuum tuarum exsultabo.
⁶Quam magnificata sunt opera tua, Domine:
nimis profundae factae sunt cogitationes tuae.
⁷Vir insipiens non cognoscet,
et stultus non intelleget haec.
⁸Cum germinaverint peccatores sicut fenum,
et floruerint omnes, qui operantur iniquitatem,
hoc tamen erit ad interitum in saeculum saeculi;
⁹tu autem altissimus in aeternum, Domine.
¹⁰Quoniam ecce inimici tui, Domine,
quoniam ecce inimici tui peribunt,
et dispergentur omnes, qui operantur iniquitatem.
¹¹Exaltabis sicut unicornis cornu meum,
perfusus sum oleo uberi.
¹²Et despiciet oculus meus inimicos meos,
et in insurgentibus in me malignantibus audiet auris mea. -
¹³Iustus ut palma florebit,
sicut cedrus Libani succrescet.
¹⁴Plantati in domo Domini,
in atriis Dei nostri florebunt.
¹⁵Adhuc fructus dabunt in senecta,
uberes et bene virentes erunt,
¹⁶ut annuntient quoniam rectus Dominus,
refugium meum, et non est iniquitas in eo.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc