¹ Magistro chori. Secundum Iduthun. Psalmus. David.
²In Deo tantum quiesce, anima mea,
ab ipso enim salutare meum.
³Verumtamen ipse refugium meum et salutare meum,
praesidium meum; non movebor amplius.
⁴Quousque irruitis in hominem, contunditis universi vos
tamquam parietem inclinatum et maceriam depulsam?
⁵Verumtamen de excelso suo cogitaverunt depellere;
delectabantur mendacio.
Ore suo benedicebant et corde suo maledicebant.
⁶In Deo tantum quiesce, anima mea, quoniam ab ipso patientia mea.
⁷Verumtamen ipse Deus meus et salutare meum,
praesidium meum; non movebor.
⁸In Deo salutare meum et gloria mea; Deus fortitudinis meae, et refugium meumin Deo est.
⁹Sperate in eo, omnis congregatio populi,
effundite coram illo corda vestra;
Deus refugium nobis.
¹⁰Verumtamen vanitas filii Adam,
mendacium filii hominum.
In stateram si conscendant,
super fumum leves sunt omnes.
¹¹Nolite sperare in violentia
et in rapina nolite decipi;
divitiae si affluant, nolite cor apponere.
¹²Semel locutus est Deus,
duo haec audivi:
quia potestas Deo est,
¹³et tibi, Domine, misericordia;
quia tu reddes unicuique iuxta opera sua.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc