¹ Precatio. David.
Inclina, Domine, aurem tuam et exaudi me,
quoniam inops et pauper sum ego.
²Custodi animam meam, quoniam sanctus sum;
salvum fac servum tuum, Deus meus, sperantem in te
³Miserere mei, Domine, quoniam ad te clamavi tota die.
⁴Laetifica animam servi tui,
quoniam ad te, Domine, animam meam levavi.
⁵Quoniam tu, Domine, suavis et mitis
et multae misericordiae omnibus invocantibus te. -
⁶Auribus percipe, Domine, orationem meam
et intende voci deprecationis meae.
⁷In die tribulationis meae clamavi ad te,
quia exaudies me.
⁸Non est similis tui in diis, Domine,
et nihil sicut opera tua.
⁹Omnes gentes, quascumque fecisti, venient
et adorabunt coram te, Domine,
et glorificabunt nomen tuum,
¹⁰quoniam magnus es tu et faciens mirabilia:
tu es Deus solus.
¹¹Doce me, Domine, viam tuam,
et ingrediar in veritate tua;
simplex fac cor meum,
ut timeat nomen tuum.
¹²Confitebor tibi, Domine Deus meus, in toto corde meo
et glorificabo nomen tuum in aeternum,
¹³quia misericordia tua magna est super me,
et eruisti animam meam ex inferno inferiori.
¹⁴Deus, superbi insurrexerunt super me,
et synagoga potentium quaesierunt animam meam
et non proposuerunt te in conspectu suo.
¹⁵Et tu, Domine, Deus miserator et misericors,
patiens et multae misericordiae et veritatis,
¹⁶respice in me et miserere mei;
da fortitudinem tuam puero tuo
et salvum fac filium ancillae tuae.
¹⁷Fac mecum signum in bonum,
ut videant, qui oderunt me, et confundantur,
quoniam tu, Domine, adiuvisti me et consolatus es me.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc