¹ Magistro chori. Psalmus. David.
²Eripe me, Domine, ab homine malo, a viro violentiae serva me.
³Qui cogitaverunt mala in corde,
tota die constituebant proelia.
⁴Acuerunt linguas suas sicut serpentis, venenum aspidum sub labiis eorum.
⁵Custodi me, Domine, de manu peccatoris
et a viro violentiae serva me,
qui cogitaverunt supplantare gressus meos.
⁶Absconderunt superbi laqueum mihi
et funes extenderunt in rete,
iuxta iter offendicula posuerunt mihi.
⁷Dixi Domino: “ Deus meus es tu;
auribus percipe, Domine, vocem deprecationis meae ”.
⁸Domine, Domine, virtus salutis meae,
obumbrasti caput meum in die belli.
⁹Ne concedas, Domine, desideria impii;
consilia eius ne perficias.
Exaltant ¹⁰caput, qui circumdant me;
malitia labiorum ipsorum operiat eos.
¹¹Cadant super eos carbones ignis,
in foveas deicias eos, et non exsurgant.
¹²Vir linguosus non firmabitur in terra,
virum violentiae mala capient in interitu.
¹³Cognovi quia faciet Dominus iudicium inopis
et vindictam pauperum.
¹⁴Verumtamen iusti confitebuntur nomini tuo,
et habitabunt recti in conspectu tuo.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc