¹In finem, pro susceptione matutina. Psalmus David. ²Deus, Deus meus, respice in me : quare me dereliquisti ?
longe a salute mea verba delictorum meorum.
³Deus meus, clamabo per diem, et non exaudies ;
et nocte, et non ad insipientiam mihi.
⁴Tu autem in sancto habitas, laus Israël.
⁵In te speraverunt patres nostri ;
speraverunt, et liberasti eos.
⁶Ad te clamaverunt, et salvi facti sunt ;
in te speraverunt, et non sunt confusi.
⁷Ego autem sum vermis, et non homo ;
opprobrium hominum, et abjectio plebis.
⁸Omnes videntes me deriserunt me ;
locuti sunt labiis, et moverunt caput.
⁹Speravit in Domino, eripiat eum :
salvum faciat eum, quoniam vult eum.
¹⁰Quoniam tu es qui extraxisti me de ventre,
spes mea ab uberibus matris meæ.
¹¹In te projectus sum ex utero ;
de ventre matris meæ Deus meus es tu :
¹²ne discesseris a me,
quoniam tribulatio proxima est,
quoniam non est qui adjuvet.
¹³Circumdederunt me vituli multi ;
tauri pingues obsederunt me.
¹⁴Aperuerunt super me os suum,
sicut leo rapiens et rugiens.
¹⁵Sicut aqua effusus sum,
et dispersa sunt omnia ossa mea :
factum est cor meum tamquam cera liquescens in medio ventris mei.
¹⁶Aruit tamquam testa virtus mea,
et lingua mea adhæsit faucibus meis :
et in pulverem mortis deduxisti me.
¹⁷Quoniam circumdederunt me canes multi ;
concilium malignantium obsedit me.
Foderunt manus meas et pedes meos ;
¹⁸dinumeraverunt omnia ossa mea.
Ipsi vero consideraverunt et inspexerunt me.
¹⁹Diviserunt sibi vestimenta mea,
et super vestem meam miserunt sortem.
²⁰Tu autem, Domine, ne elongaveris auxilium tuum a me ;
ad defensionem meam conspice.
²¹Erue a framea, Deus, animam meam,
et de manu canis unicam meam.
²²Salva me ex ore leonis,
et a cornibus unicornium humilitatem meam.
²³Narrabo nomen tuum fratribus meis ;
in medio ecclesiæ laudabo te.
²⁴Qui timetis Dominum, laudate eum ;
universum semen Jacob, glorificate eum.
²⁵Timeat eum omne semen Israël,
quoniam non sprevit, neque despexit deprecationem pauperis,
nec avertit faciem suam a me :
et cum clamarem ad eum, exaudivit me.
²⁶Apud te laus mea in ecclesia magna ;
vota mea reddam in conspectu timentium eum.
²⁷Edent pauperes, et saturabuntur,
et laudabunt Dominum qui requirunt eum :
vivent corda eorum in sæculum sæculi.
²⁸Reminiscentur et convertentur ad Dominum universi fines terræ ;
et adorabunt in conspectu ejus universæ familiæ gentium :
²⁹quoniam Domini est regnum,
et ipse dominabitur gentium.
³⁰Manducaverunt et adoraverunt omnes pingues terræ ;
in conspectu ejus cadent omnes qui descendunt in terram.
³¹Et anima mea illi vivet ;
et semen meum serviet ipsi.
³²Annuntiabitur Domino generatio ventura ;
et annuntiabunt cæli justitiam ejus
populo qui nascetur, quem fecit Dominus.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc