¹Psalmus David. Adversus Goliath. Benedictus Dominus Deus meus,
qui docet manus meas ad prælium,
et digitos meos ad bellum.
²Misericordia mea et refugium meum ;
susceptor meus et liberator meus ;
protector meus, et in ipso speravi,
qui subdit populum meum sub me.
³Domine, quid est homo, quia innotuisti ei ?
aut filius hominis, quia reputas eum ?
⁴Homo vanitati similis factus est ;
dies ejus sicut umbra prætereunt.
⁵Domine, inclina cælos tuos, et descende ;
tange montes, et fumigabunt.
⁶Fulgura coruscationem, et dissipabis eos ;
emitte sagittas tuas, et conturbabis eos.
⁷Emitte manum tuam de alto : eripe me,
et libera me de aquis multis,
de manu filiorum alienorum :
⁸quorum os locutum est vanitatem,
et dextera eorum dextera iniquitatis.
⁹Deus, canticum novum cantabo tibi ;
in psalterio decachordo psallam tibi.
¹⁰Qui das salutem regibus,
qui redemisti David servum tuum de gladio maligno,
¹¹eripe me, et erue me de manu filiorum alienorum,
quorum os locutum est vanitatem,
et dextera eorum dextera iniquitatis.
¹²Quorum filii sicut novellæ plantationes in juventute sua ;
filiæ eorum compositæ,
circumornatæ ut similitudo templi.
¹³Promptuaria eorum plena, eructantia ex hoc in illud ;
oves eorum f?tosæ, abundantes in egressibus suis ;
¹⁴boves eorum crassæ.
Non est ruina maceriæ, neque transitus,
neque clamor in plateis eorum.
¹⁵Beatum dixerunt populum cui hæc sunt ;
beatus populus cujus Dominus Deus ejus.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc