¹Spiritus meus attenuabitur ;
dies mei breviabuntur :
et solum mihi superest sepulchrum.
²Non peccavi,
et in amaritudinibus moratur oculus meus.
³Libera me, Domine, et pone me juxta te,
et cujusvis manus pugnet contra me.
⁴Cor eorum longe fecisti a disciplina :
propterea non exaltabuntur.
⁵Prædam pollicetur sociis,
et oculi filiorum ejus deficient.
⁶Posuit me quasi in proverbium vulgi,
et exemplum sum coram eis.
⁷Caligavit ab indignatione oculus meus,
et membra mea quasi in nihilum redacta sunt.
⁸Stupebunt justi super hoc,
et innocens contra hypocritam suscitabitur.
⁹Et tenebit justus viam suam,
et mundis manibus addet fortitudinem.
¹⁰Igitur omnes vos convertimini, et venite,
et non inveniam in vobis ullum sapientem.
¹¹Dies mei transierunt ;
cogitationes meæ dissipatæ sunt,
torquentes cor meum.
¹²Noctem verterunt in diem,
et rursum post tenebras spero lucem.
¹³Si sustinuero, infernus domus mea est,
et in tenebris stravi lectulum meum.
¹⁴Putredini dixi : Pater meus es ;
Mater mea, et soror mea, vermibus.
¹⁵Ubi est ergo nunc præstolatio mea ?
et patientiam meam quis considerat ?
¹⁶In profundissimum infernum descendent omnia mea :
putasne saltem ibi erit requies mihi ?

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc