¹Qui diligit filium suum assiduat illi flagella,
ut lætetur in novissimo suo,
et non palpet proximorum ostia.
²Qui docet filium suum laudabitur in illo,
et in medio domesticorum in illo gloriabitur.
³Qui docet filium suum in zelum mittit inimicum,
et in medio amicorum gloriabitur in illo.
⁴Mortuus est pater ejus, et quasi non est mortuus :
similem enim reliquit sibi post se.
⁵In vita sua vidit, et lætatus est in illo :
in obitu suo non est contristatus,
nec confusus est coram inimicis :
⁶reliquit enim defensorem domus contra inimicos,
et amicis reddentem gratiam.
⁷Pro animabus filiorum colligabit vulnera sua,
et super omnem vocem turbabuntur viscera ejus.
⁸Equus indomitus evadit durus,
et filius remissus evadet præceps.
⁹Lacta filium, et paventem te faciet :
lude cum eo, et contristabit te.
¹⁰Non corrideas illi, ne doleas,
et in novissimo obstupescent dentes tui.
¹¹Non des illi potestatem in juventute,
et ne despicias cogitatus illius.
¹²Curva cervicem ejus in juventute,
et tunde latera ejus dum infans est,
ne forte induret, et non credat tibi,
et erit tibi dolor animæ.
¹³Doce filium tuum, et operare in illo,
ne in turpitudinem illius offendas.
¹⁴Melior est pauper sanus, et fortis viribus,
quam dives imbecillis et flagellatus malitia.
¹⁵Salus animæ in sanctitate justitiæ
melior est omni auro et argento :
et corpus validum quam census immensus.
¹⁶Non est census super censum salutis corporis,
et non est oblectamentum super cordis gaudium.
¹⁷Melior est mors quam vita amara,
et requies æterna quam languor perseverans.
¹⁸Bona abscondita in ore clauso,
quasi appositiones epularum circumpositæ sepulchro.
¹⁹Quid proderit libatio idolo ?
nec enim manducabit, nec odorabit.
²⁰Sic qui effugatur a Domino,
portans mercedes iniquitatis :
²¹videns oculis et ingemiscens,
sicut spado complectens virginem, et suspirans.
²²Tristitiam non des animæ tuæ,
et non affligas temetipsum in consilio tuo.
²³Jucunditas cordis, hæc est vita hominis,
et thesaurus sine defectione sanctitatis :
et exsultatio viri est longævitas.
²⁴Miserere animæ tuæ placens Deo, et contine :
congrega cor tuum in sanctitate ejus,
et tristitiam longe repelle a te.
²⁵Multos enim occidit tristitia,
et non est utilitas in illa.
²⁶Zelus et iracundia minuunt dies,
et ante tempus senectam adducet cogitatus.
²⁷Splendidum cor et bonum in epulis est :
epulæ enim illius diligenter fiunt.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc