¹Locutusque est Dominus ad Moysen dicens: ²“ Ecce voca vi ex nomine Beseleel filium Uri filii Hur de tribu Iudae ³et implevi eum spiritu Dei, sapientia et intellegentia et scientia in omni opere ⁴ad excogitandum, quidquid fabrefieri potest ex auro et argento et aere, ⁵ad scindendum et includendum gemmas et ad sculpendum ligna, ad faciendum omne opus; ⁶dedique ei socium Ooliab filium Achisamech de tribu Dan et in corde omnis eruditi posui sapientiam, ut faciant cuncta, quae praecepi tibi: ⁷tabernaculum conventus et arcam testimonii et propitiatorium, quod super eam est, et cuncta vasa tabernaculi ⁸mensamque et vasa eius, candelabrum purissimum cum vasis suis et altaria thymiamatis ⁹et holocausti et omnia vasa eorum, labrum cum basi sua ¹⁰et vestes textas et vestes sanctas Aaron sacerdoti et vestes filiorum eius, ut fungantur officio suo in sacris, ¹¹oleum unctionis et thymiama aromatum in sanctuario: omnia, quae praecepi tibi, facient ”.
¹²Et locutus est Dominus ad Moysen dicens: ¹³“ Loquere filiis Israel et dices ad eos: Videte ut sabbatum meum custodiatis, quia signum est inter me et vos in generationibus vestris, ut sciatis quia ego Dominus, qui sanctifico vos. ¹⁴Custodite sabbatum, sanctum est enim vobis. Qui polluerit illud, morte morietur; qui fecerit in eo opus, peribit anima illius de medio populi sui. ¹⁵Sex diebus facietis opus; in die septimo sabbatum est, requies sancta Domino: omnis, qui fecerit opus in hac die, morietur. ¹⁶Custodiant filii Israel sabbatum et celebrent illud in generationibus suis: pactum est sempiternum ¹⁷inter me et filios Israel signumque perpetuum; sex enim diebus fecit Dominus caelum et terram et in septimo ab opere cessavit et respiravit ”.
¹⁸Deditque Dominus Moysi, completis huiuscemodi sermonibus in monte Sinai, duas tabulas testimonii lapideas scriptas digito Dei.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc