¹Locutus est autem David Domino verba carminis huius in die, qua liberavit eum Dominus de manu omnium inimicorum suorum et de manu Saul,
²et ait: “ Dominus petra mea et arx mea et salvator meus;
³Deus meus, rupes mea, in quam confugiam, scutum meum et cornu salutis meae! Munimentum meum et refugium meum. Salvator meus, de violentia liberabis me.
⁴Laudabilem invocabo Dominum et ab inimicis meis salvus ero.
⁵Quia circumdederunt me fluctus mortis, torrentes Belial terruerunt me;
⁶praeoccupaverunt me laquei mortis.
⁷In tribulatione mea invocavi Dominum et ad Deum meum clamavi; et exaudivit de templo suo vocem meam, et clamor meus venit ad aures eius.
⁸Commota est et contremuit terra; fundamenta caelorum concussa sunt et conquassata, quoniam iratus est.
⁹Ascendit fumus de naribus eius, et ignis de ore eius vorabat; carbones incensi sunt ab eo.
¹⁰Et inclinavit caelos et descendit, et caligo sub pedibus eius.
¹¹Et ascendit super cherub et volavit et devolavit super pennas venti.
¹²Posuit tenebras in circuitu suo tabernaculum suum, tenebrosas aquas, nubes densissimas.
¹³Prae fulgore in conspectu eius incensi sunt carbones ignis.
¹⁴Intonuit de caelo Dominus, et Excelsus dedit vocem suam.
¹⁵Misit sagittas et dissipavit eos, fulguravit fulmina et conturbavit eos.
¹⁶Et apparuerunt effusiones maris, et revelata sunt fundamenta orbis ab increpatione Domini, ab inspiratione spiritus furoris eius.
¹⁷Misit de excelso et assumpsit me, traxit me de aquis multis;
¹⁸liberavit me ab inimico meo potentissimo, ab his, qui oderant me, qui robustiores me erant.
¹⁹Praevenerunt me in die afflictionis meae, et factus est Dominus firmamentum meum;
²⁰et eduxit me in latitudinem, liberavit me, quia complacui ei.
²¹Retribuit mihi Dominus secundum iustitiam meam et secundum munditiam manuum mearum reddit mihi,
²²quia custodivi vias Domini et non egi impie a Deo meo.
²³Omnia enim iudicia eius in conspectu meo, et a praeceptis eius non recessi;
²⁴et fui immaculatus cum eo et custodivi me ab iniquitate mea.
²⁵Et retribuet mihi Dominus secundum iustitiam meam et secundum munditiam meam in conspectu oculorum suorum.
²⁶Cum sancto sanctus eris et cum viro innocente innocens eris;
²⁷cum electo electus eris et cum perverso callidus eris.
²⁸Et populum pauperem salvum facies et oculos superborum humiliabis,
²⁹quia tu lucerna mea, Domine, et Deus meus illuminat tenebras meas.
³⁰In te enim aggrediar hostium turmas, in Deo meo transiliam murum.
³¹Deus, immaculata via eius, eloquium Domini igne examinatum; scutum est omnium sperantium in se.
³²Quoniam quis est Deus praeter Dominum? Et quae rupes praeter Deum nostrum?
³³Deus, qui accinxit me fortitudine et complanavit perfectam viam meam,
³⁴coaequans pedes meos cervis et super excelsa statuens me;
³⁵docens manus meas ad proelium, et tendunt arcum aereum brachia mea.
³⁶Dedisti mihi clipeum salutis tuae, et exauditio tua magnificavit me.
³⁷Dilatasti gressus meos subtus me, et non sunt infirmati tali mei.
³⁸Persequebar inimicos meos et conterebam et non convertebar, donec consumerem eos.
³⁹Consumpsi eos et confregi, ut non consurgerent: ceciderunt sub pedibus meis.
⁴⁰Accinxisti me fortitudine ad proelium, incurvasti insurgentes in me subtus me.
⁴¹Inimicos meos dedisti mihi dorsum, odientes me, et disperdidi eos.
⁴²Clamaverunt, et non erat qui salvaret, ad Dominum, et non exaudivit eos.
⁴³Contrivi eos ut pulverem terrae, quasi lutum platearum comminui eos.
⁴⁴Salvasti me a contradictionibus populi mei, constituisti me in caput gentium. Populus, quem ignorabam, servit mihi,
⁴⁵filii alieni blandiuntur mihi, auditu auris oboediunt mihi.
⁴⁶Filii alieni defluunt et contremiscunt ex arcibus suis.
⁴⁷Vivit Dominus, et benedicta petra mea, et exaltetur Deus, petra salutis meae.
⁴⁸Deus, qui das vindictas mihi et deicis populos sub me.
⁴⁹Qui educis me ab inimicis meis et ab insurgentibus in me elevas me; a viro iniquo liberas me.
⁵⁰Propterea confitebor tibi, Domine, in gentibus, et nomini tuo cantabo:
⁵¹Magnificat salutes regis sui et facit misericordiam christo suo David et semini eius in sempiternum ”.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc