¹Vir, qui correptiones dura cervice contemnit,subito conteretur absque sanatione.
²In multiplicatione iustorum laetabitur vulgus;et in dominatione impii gemet populus.
³Vir, qui amat sapientiam, laetificat patrem suum;qui autem nutrit scorta, perdet substantiam.
⁴Rex in iustitia erigit terram;vir acceptor donorum destruet eam.
⁵Homo, qui blanditur amico suo,rete expandit gressibus eius.
⁶In peccato vir iniquus irretitur laqueo,et iustus exsultabit atque gaudebit.
⁷Novit iustus causam pauperum,impius ignorat scientiam.
⁸Homines pestilentes dissipant civitatem;sapientes vero avertunt furorem.
⁹Vir sapiens, si cum stulto iudicio contenderit,sive irascatur sive rideat, non inveniet requiem.
¹⁰Viri sanguinum oderunt simplicem;iusti autem quaerunt animam eius.
¹¹Totum spiritum suum profert stultus;sapiens mitigat eum in posterum.
¹²Princeps, qui libenter audit verba mendacii,omnes ministros habet impios.
¹³Pauper et oppressor obviaverunt sibi,utriusque oculorum illuminator est Dominus.
¹⁴Rex, qui iudicat in veritate pauperes,thronus eius in aeternum firmabitur.
¹⁵Virga atque correptio tribuit sapientiam;puer autem, qui dimittitur voluntati suae, confundit matrem suam.
¹⁶In multiplicatione impiorum multiplicabuntur scelera,et iusti ruinas eorum videbunt.
¹⁷Erudi filium tuum, et refrigerabit teet dabit delicias animae tuae.
¹⁸Cum visio defecerit, dissipabitur populus;qui vero custodit legem, beatus est.
¹⁹Servus verbis non potest erudiri,quia intellegit et respondere contemnit.
²⁰Vidisti hominem velocem ad loquendum?Magis illo spem habebit insipiens.
²¹Qui delicate a pueritia nutrit servum suum,postea sentiet eum contumacem.
²²Vir iracundus provocat rixas;et, qui ad indignandum facilis est, erit ad peccandum proclivior.
²³Superbia hominis humiliabit eum,et humilis spiritu suscipiet gloriam.
²⁴Qui cum fure participat, odit animam suam;adiuramentum audit et non indicat.
²⁵Timor hominis inducit laqueum;qui sperat in Domino, sublevabitur.
²⁶Multi requirunt faciem principis;et iudicium a Domino egreditur singulorum.
²⁷Abominantur iusti virum impium;et abominantur impii eos, qui recta sunt via.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc