¹“ Vae, filii desertores, dicitDominus,eo quod facitis consilium et non ex me,et pactum statuitis et non per spiritum meum,ut addatis peccatum super peccatum!
²Qui ambulatis, ut descendatis in Aegyptum,et os meum non interrogastis,sperantes auxilium in fortitudine pharaoniset habentes fiduciam in umbra Aegypti.
³Et erit vobis fortitudo pharaonis in confusionem,et fiducia sub umbra Aegypti in ignominiam.
⁴Cum fuerint enim in Tani principes tui,et nuntii tui usque ad Hanes pervenerint,
⁵omnes confundentursuper populo, qui eis prodesse non potest;non erit in auxilium et in utilitatem sed in confusionem et opprobrium ”.
⁶Oraculum iumentorum Nageb.In terra tribulationis et angustiae,leaenae et leonis rugientis,viperae et draconis volantisportant super umeros iumentorum divitias suaset super gibbum camelorum thesauros suosad populum, qui eis prodesse non poterit.
⁷Aegyptus enim frustra et vane auxiliabitur;ideo vocavi Rahab otiosam.
⁸Nunc ingredere, scribe coram eis super buxumet in libro diligenter exara illud,et erit in posterumin testimonium usque in aeternum.
⁹Populus enim rebellis est,et filii mendaces,filii nolentes audire legem Domini;
¹⁰qui dicunt videntibus: “ Nolite videre ”et aspicientibus: “ Nolite aspicere nobis ea, quae recta sunt;loquimini nobis placentia, aspicite nobis illusiones.
¹¹Recedite a via, declinate a semita,tollite a facie nostra Sanctum Israel ”.
¹²Propterea haec dicit Sanctus Israel:“ Pro eo quod reprobastis verbum hocet sperastis in perversitatem et in perfidiamet innixi estis super eis,
¹³propterea erit vobis iniquitas haecsicut interruptio cadens, locus tumens in muro excelso,cuius confractio subito, dum non speratur,venit improviso;
¹⁴et comminuetur, sicut conteritur lagoena figuli,contritione absque misericordia,et non invenietur de fragmentis eius testa,in qua capiatur igniculus de incendio,aut hauriatur aqua de fovea ”.
¹⁵Quia haec dixit Dominus Deus, Sanctus Israel:“ In conversione et quiete salvi eritis;in silentio et in spe erit fortitudo vestra ”.Et noluistis
¹⁶et dixistis:“ Nequaquam, sed super equis fugiemus ”,ideo fugietis;et: “ Super veloces ascendemus ”,ideo veloces erunt, qui persequentur vos.
¹⁷Mille pavebunt a facie terroris unius,et a facie terroris quinque fugietis,donec relinquaminiquasi malus in vertice montiset quasi signum super collem.
¹⁸Propterea exspectat Dominus, ut misereatur vestri,et ideo exaltabitur parcens vobis,quia Deus iudicii Dominus;beati omnes, qui exspectant eum.
¹⁹Nam, popule Sion, qui habitas in Ierusalem,plorans nequaquam plorabis:miserans miserebitur tui ad vocem clamoris tui;statim ut audierit, respondebit tibi.
²⁰Et dabit vobis Dominuspanem angustiae et aquam afflictionis,sed non amplius avolabit a te doctor tuus;et erunt oculi tui videntes praeceptorem tuum,
²¹et aures tuae audient verbum post tergum monentis:“ Haec via, ambulate in ea ”,si declinaveritis ad dexteram vel ad sinistram.
²²Et contaminabis laminas sculptilium argentorum tuorumet vestimentum conflatilis aurei tui;disperges ea sicut immunditiam menstruatae.“ Egredere ” dices ei.
²³Et dabit pluviam semini tuo,quod seminaveris in terra,et panis frugum terrae erit uberrimus et pinguis;pascetur pecus tuum in die illo, agnus in pascuis spatiosis,
²⁴et boves tui et asini, qui operantur terram,commixtum migma comedentventilatum in pala et ventilabro.
²⁵Et erunt super omnem montem excelsumet super omnem collem elevatumrivi currentium aquarumin die interfectionis multorum,cum ceciderint turres.
²⁶Et erit lux lunae sicut lux solis,et lux solis erit septempliciter sicut lux septem dierumin die, qua alligaverit Dominus vulnus populi suiet percussuram plagae eius sanaverit.
²⁷Ecce nomen Domini venit de longinquo,ardens furor eius, et gravis eius fragor;labia eius repleta sunt indignatione,et lingua eius quasi ignis devorans.
²⁸Spiritus eius velut torrens inundans,usque ad collum pertingens,ad cribrandas gentes in cribro funesto,et frenum dolosum in maxillis populorum.
²⁹Canticum erit vobissicut nox sanctificatae sollemnitatis,et laetitia cordissicut eius, qui ad sonum tibiae pergitin montem Domini,ad petram Israel.
³⁰Et auditam faciet Dominusgloriam vocis suaeet terrorem brachii suiostendet in comminatione furoriset flamma ignis devorantis,in turbine et in imbre et in lapide grandinis.
³¹A voce enim Domini pavebitAssyrius virga percussus.
³²Et erit omnis ictus baculi percutientis,quem requiescere faciet Dominussuper eum in tympanis et citharis,et in bellis agitatis expugnabit eos.
³³Praeparata est enim ab heri Topheth,praeparata, profunda et dilatata,in pyra eius ignis et ligna multa;flatus Domini sicut torrens sulphurissuccendit eam.

---

Gen Ex Lv Nm Deut Ios Iudc Ruth 1 Re 2 Re 3 Re 4 Re 1 Par 2 Par Esd Neh Tob Iudt Esth 1 Mach 2 Mach Iob Ps Prov Eccle Cant Sap Eccli Isa Ier Lam Bar Ez Dan Os Ioel Am Abd Ion Mi Nah Hab Soph Agg Zach Mal Mt Mc Lc Io Act Rom 1Cor 2Cor Gal Eph Phil Col 1 Thess 2 Thess 1 Tim 2 Tim Tit Philem Hebr Iac 1 Pt 2 Pt 1 Io 2 Io 3 Io Iud Apoc